أنا جنبك
ومش هابعد ومش هامشى
أنا جنبك
وأقرب من هوى قلبك ومتخافش
أنا أقرب من الصورة اللى جو عنيك
وليه تبعد .... متبعدش
انا جيتلك
هبدّل كل احزانك
فلو تحزن هكون فرحك
ولو تزعل هاجى لقلبك انا واصالحك
هكون لعنيك كما الخضرة
وهبقالك كما العصفور
وبيرفرف على قلبك
وبيغنى .... أنا جنبك
هاشيل عنك
وأكون سندك
وهابنيلك قصور فرحة
واجيب قلبى يقف حارس على قلبك
عشان الحزن ما يدخل
وهببنى جو قصر القلب أحلامنا
ولو نصبر
هيجى اليوم وأحلامنا هتحقق
ومش هنمـّل
ولا هنكـّل من بكره
ولو بكره هيتعقد
هنلقى بعد بكره الحل
فمتخافش ولا تقلق
أنا جنبك
ولو مرة الطريق ضلّم هنوّرلك
ولو تتعب من التفكير هفكّرلك
ولو تعبك ضلام الليل هكون شمسك
وأكون قمرك ونجم سماك
ولو تعطش هكون مطرك
عشان يرويك
وهينبت كمان ورده
وأحلى الورد انا ههديك
أنا جنبك
ولو قلبك مهوش عاوز يكون جنبى
فيا قلبى ...وروح قلبى
أنا قلبى بيحتاجلك
